القائمة الرئيسية

الصفحات

مراجعة مسلسل ما وراء الطبيعة - مسلسل فاق كل التوقعات



من لحظة البداية وحتى إشعار النهاية المسلسل بيقدم إبداع وأجواء جديدة على الدراما المصرية تشدّك في كل دقيقة وأنت بتتفرج، وتخرج منه وأنت شبعان فُرجة.

- صناع المسلسل مستخدمين كل الأدوات بالشكل الأمثل .. الغموض وحبس الأنفاس موجودين من اللحظة الأولى إلى جانب التشويق والإثارة .. كل العوامل دي تخليك تشوف الست حلقات ورا بعض وجواك الشغف اللي يشجعك تشوفهم تاني وتالت كأنك بتشوفهم أول مرة.

- قرارات المسلسل كانت في محلها .. عارف امتى يعلي الرتم وامتى يهديه وامتى يأجل وامتى يقفل زي الطباخ الشاطر اللي عارف ازاي يسوّي الأكلة بتاعته ودي حاجة افتقدناها في الأعمال المصرية.

- تميز إخراجي وإبهار بصري من عمرو سلامة والفريق المعاون ليه واستخدام موفق للمؤثرات .. هتستمتع بتجربة بصرية مليانة بالكادرات المميزة مع الموسيقى الجميلة اللي هتدخلك في المود بسرعة وتوصلك وتخضّك وتأثر فيك.

- أحمد أمين كسب الرهان .. هتشوف تجسيد ممتاز لرفعت إسماعيل وهتلمسه في المشية الستيناتي وطريقة الكلام والنظرات والأداء الحركي حتى الانفعالات .. قادر ينقل ليك المشاعر اللي تعيّشك مع الشخصية بكل جوانبها وأبعادها؛ عشان كدا المسلسل مكدبش لما قال إنك هتعيش الأحداث عشان فعليا هتحس إن غارس جواها طول الست حلقات. 

- تجربة ما وراء الطبيعة من أمتع التجارب في 2020 إن مكنتش أمتعهم .. هتستمتع بيها حتى ولو كنت قاري للسلسلة فاطمّن.

- ولما تخلّص هتتأكد إن عندنا عظمة بس مدفونة ومحتاجين بس اللي يطلّعها ويشيل التراب من عليها. 

مسلسل ما وراء الطبيعة متوفر بالكامل الآن علي نتفيلكس 

الحلقة الأولي : أسطورة البيت - 52 دقيقة 

الحلقة الثانية : أسطورة لعنة الفرعون - 46 دقيقة 

الحلقة الثالثة : أسطورة حارس الكهف - 55 دقيقة 

الحلقة الرابعة : أسطورة النداهة - 49 دقيقة     

الحلقة الخامسة : أسطورة الجاثوم - ٤٥ دقيقة 

الحلقة السادسة : أسطورة العودة للبيت - 53 دقيقة

هل اعجبك الموضوع :

تعليقات

التنقل السريع